جهاز العروسة : سرابس الفطور

توا نبدى بالحاجات الكبيرة اللي تستحقها العروسة في جهازها واللي هوما كلفتهم عالية نوعا ما:

- سرابس الفطور:

بالطبيعة كل عروسة يلزمها تخرج سربيس فطور وهو حاجة ضرورية في جهاز.... ثما اللي فلوسها على قدها تخرج سربيس نص وتقول فيه البركة وثما اللي تخرج سربيس نص وسربيس كامل معانها يبدى فيه من المائة قطعة فما فوق.

وسرابس الفطور في تونس أنواع لا تحصى ولا تعد بالنسبة لسربيس نص أنا نفضل دائما بش يكون فيه من الخمسين قطعة فما فوق يعني:

سربيس نص متكون من 6 آصحنة كبار و6آصحنة غارقين و6 آصحنة صغار إلى جانب الصوبيرية وماعون القهوة
في بلادنا اللي متوفرين توا ثما 32قطعة و47 قطعة و53 قطعة و66 قطعة وعدة أنواع أخرى طبعا والعروسة بالطبيعة هي اللي تختار الزينة متع سربيسها معناها على حسب لون الكوجينة.كلفة السربيس من 50دينار إلى 200 دينار معناها إنت والجودة متع الفخار.

توا نتعادى لسربيس كامل واللي هو متكون من 101 قطعة فما فوق:

يعني 12 آصحن كبير و12 صحن غارق و12 آصحن متوسط و2 صوبريات و12 كاس قهوة و12 كاس قهوة حليب و2 كفتيار متع حليب والسكرية والكفتيار متع القهوة وعدة قطع أخرى.

في تونس موجود حاليا 100 قطعة و101 قطعة وهو أكثر ما تقتنيه العروس وثما زاد 120 و130 و170 قطعة .... بالنسبة لسرابس اللي أكثر من 101 قطعة يزيدك 12 صحفة وقطع أخرى كيما حاملة السرفيات والسندرية ومغارف لكؤوس القهوة وغيرها من القطع الأخرى.
وكلفة السربيس تتراوح من 220 دينار إلى 400 دينار إلى 800 دينار وصولا إلى سربيس بثلاثة ملايين.

أخيرا حبيت نقول فما سرابس ممتازة تتكون من 8 آصحنة كبار و8 آصحنة غارقين.... وكل القطع ثمانية وهي أحسن السرابس بالنسبة لي ومتكونة من 49 قطعة و53 قطعة و66 قطعة وكلفتها تتراوح بين 80 دينار و 130 دينار.

في إنتظار رأي الأخوات في سرابس الفطور وشنوا يفضلوا بش يشروا وقداش تحب الأخت تخرج من سربيس في جهازها نقلكم الموضوع متواصل ودمتم في حفظ الله ورعايته

التصنيف :